რუსეთში მოღვაწე ქართველმა პლასტიკურმა ქირურგმა, ციცინო შურღაიამ „ნანუკას შოუში“ ერთ-ერთი „კანონიერი ქურდისთვის“ პლასტიკური ოპერაციის ჩატარებაზე ისაუბრა და აღნიშნა, რომ ახალი ყურისთვის რამდენიმე დღე მორგში დადიოდა.

შურღაიას გადაცემაში არ დაუკონკრეტებია, თუ რომელ „კანონონიერ ქურდს“ გადაუნერგა გარდაცვლილის ყური, თუმცა ცნობილია, რომ ერთადერთი კრიმინალური „ავტორიტეტი“, რომელსაც ყურის გადანერგვა დასჭირდა 37 წლის რაფიკ ეივაზოვია. მას ქურდულ სამყაროში „რაფიკ მასალინსკის“ სახელით იცნობენ.

2017 წლის დასაწყისში რაფიკ ეივაზოვს მოსკოვის ერთ-ერთ რესტორანში თავს დაესხნენ. საქართველოს მოქალაქემ, ეროვნებით აზერბაიჯანელმა ელშან მამედოვმა მას ყური მოაჭრა, მოგვიანებით კი მოჭრილი ყურის ფოტოები დემონსტრაციულად სოციალურ ქსელში გამოაქვეყნა.

კრიმინალურმა ვენდეტამ არ დააყოვნა... 2017 წლის 12 სექტემბერს, თბილისში, აბანოთუბანში მდებარე რესტორან „მასპინძელოსთან“ „ლენდ კრუიზერის“ მარკის ავტომობილში ელშან მამედოვი ჩაცხრილეს.

მოგვიანებით, „პრაიმტაიმისთვის“ ცნობილი გახდა, რომ აღნიშნული დანაშაულისთვის ბრალი დაუსწრებლად წარუდგინეს რუსეთის ფედერაციის ორ მოქალაქეს - 42 წლის გუსეინ ისკანდეროვს და 38 წლის ემინ ახმედოვს. ორივე მათგანს აღკვეთი ღონისძიების სახით პატიმრობა დაუსწრებლად შეეფარდა და ოფიციალური ძებნა გამოცხადდა.

გავრცელებული ინფორმაციით, მათ ელშან მამედოვის მკვლელობა რაფიკ ეივაზომმა დაუკვეთა, რაშიც 500 ათასი დოლარი გადაიხადა.

ელშან მამედოვი გავლენიანი აზერბაიჯანელი „კანონიერი ქურდის“ ნადირ სალიფოვის (ლოტი გული) უახლოეს გარემოცვას წარმოადგენდა. აზერბაიჯანული მედიის ცნობით, ციხიდან მრავალწლიანი პატიმრობის შემდეგ გათავისუფლებულმა სალიფოვმა პირველი რაც გააკეთა, სწორედ ბაქოში ელშან მამედოვის საფლავის მონახულება იყო.  

ამჟამად, მამედოვის მკვლელობაში ბრალდებული ორივე პირი სანკტ-პეტერბურგის იზოლატორში იმყოფება. ისკანედროვი და ახმედოვი რუსმა სამართალდამცავებმა სანკტ-პეტერბურგის სასამართლოს შენობასთან კიდევ ერთი მკვლელობის მომზადების ფაქტზე აიყვანეს. დაკავებულების ჩხრეკისას ხელბორკილები, ნიღბები და ბინოკლები ამოიღეს.

მიუხედავად იმისა, რომ მათზე ქართულ მხარეს საერთაშორისო ძებნა აქვს გამოცხადებული, სავარაუდოდ საქართველოში ექსტრადირება ვერ მოხდება, რადგან ისკანდეროვიც და ახმედოვიც რუსეთის მოქალაქეები არიან, საკუთარი ქვეყნის მოქალაქის უცხო ქვეყნისთვის გადაცემას კი კანონმდებლობა კრძალავს.