იოსებ სტალინის შვილთაშვილმა იაკობ (იაშა) ჯუღაშვილმა „მორალური მახინჯი“ და „დეგენერატი“ უწოდა რუსეთის მოსახლეობის იმ ნაწილს, რომელიც სტალინურ რეპრესიებს ნორმალურ მოვლენად მიიჩნევს. ეს პოზიცია ჯუღაშვილმა რადიოსადგურ „Говорит Москва“–ს ეთერში დააფიქსირა.

„ლევადა–ცენტრის“ მიერ რუსეთში ჩატარებული ბოლო სოციოლოგიური კვლევის შედეგების თანახმად, რესპონდენტთა 46% სტალინური ეპოქის მსხვერპლს გამართლებულად მიიჩნევს; მთლიანობაში, რუსეთის მოქალაქეების მიერ იოსებ სტალინის მიმართ დადებითმა დამოკიდებულებამ ისტორიული რეკორდი მოხსნა და სადღეისოდ 70%–ს აღწევს.  

იაკობ ჯუღაშვილის განცხადებით, იგი ამ მონაცემებით შეძრწუნებულია:

„რაზე მეტყველებს ეს? - ალბათ, იმაზე, რომ 46% დანაშაულს ნორმალურ მოვლენად მიიჩნევს. ანტისტალინურმა და ანტისაბჭოურმა სიცრუემ ხალხი მორალურ მახინჯებად და დეგენერატებად აქცია, რომლებიც გულწრფელად თვლიან, რომ დიადი მიზნები მიიღწევა დანაშაულების ჩადენით მათი მხრიდან, ვისაც სამსახურებრივად დანაშაულთან ბრძოლა ევალება - ანუ სახელმწიფო მოხელეების. ჩემთვის ეს არის მთავარი ამ მონაცემებში“.