26 მაისს გორში საქართველოს იუსტიციის სამინისტრო სხვადასხვა ღონისძიებებს გეგმავს. როგორც უწყებაში ,,დიანიუსს" განუცხადეს, ღონისძიების ფარგლებში სტუმრები შეძლებენ 

ესტუმრონ ვიზალიბერალიზაციის უზარმაზარ პავილიონს, სადაც გაიზიარებენ ცოდნას ვიზალიბერალიზაციით სწორად სარგებლობის შესახებ, კერძოდ: გაიარონ „საპასპორტო კონტროლი“, „ჩასხდნენ თვითმფრინავში“, „დაელოდონ ბარგს“, თავად შეარჩიონ მოგზაურობისთვის სასურველი ქალაქი ევროპის რუკაზე; ისარგებლონ მემოგრამით და „გადაიღონ“ ფოტო საყვარელი ქალაქის ფონზე (მაგ.: პარიზი, რომი, პრაღა და სხვა);

მოედანზე განთავსებული საინფორმაციო სტენდების საშუალებით გაიზიარონ ცოდნა გამოჩენილ ქართველ მოღვაწეებზე, საინტერესო ფაქტებსა და ქალაქ გორის ღირსშესანიშნაობებზე;

ესტუმრონ საუკუნისწინანდელ არტკაფე „მანდილოსანს“ და გაიზიარონ ცოდნა ქალთა უფლებებზე, წარმატებულ ქართველ ქალებზე და ა.შ. 

იხილონ ადგილობრივი ხელოვანების, მხატვრების, მოქანდაკეების ნამუშევრები და სურვილის შემთხვევაში შეიძინონ კიდეც;

 ესტუმრონ ღია კინოთეატრს და შეარჩიონ სასურველი სეანსი მთელი დღის განმავლობაში; კერძოდ: იხილონ იუსტიციის სამინისტროს ეროვნული არქივის მიერ აღდგენილი ანიმაციური ფილმები, ეროვნული არქივის მდიდარი საარქივო კინოდოკუმენტები; 

დამოუკიდებლობის დღის ყველაზე პატარა მონაწილეებს საშუალება ექნებათ, მთელი დღის განმავლობაში ისარგებლონ ბავშვების გასართობი სივრცითა და მრავალფეროვანი პროგრამით;

გორის მთავარ მოედანზე გელით, ასევე, ადგილობრივთა ნახელავი: ხელნაკეთი ნივთებისა და სასოფლო-სამეურნეო პროდუქტების გამოფენა-გაყიდვა.

აღნიშნულ ღონისძიებებზე თანხები ცენტრალური ბიუჯეტიდან დაიხარჯება.