რა ეღირება კორონა ვირუსის საწინააღმდეგო ვაქცინა, რომელიც სექტემბრისთვის შეზღუდული დოზით იქნება მზად
- 27/04/20
- 3173 ნახვა
ვაქცინების მწარმოებელი მსოფლიოს უმსხვილესი კომპანია კორონავირუსის საწინააღმდეგო იმ ვაქცინის მასიურ წარმოებას იწყებს, რომელიც ოქსფორდის უნივერსიტეტში შეიქმნა. ადამიანებზე მისი გამოცდაც დაიწყო, თუმცა ჯერჯერობით უცნობია ეფექტურობა.
გამოცემა Business Insider წერს, რომ საუბარია ინდოეთის სერუმის ინსტიტუტზე (Serum Institute of India), რომელიც ვაქცინების უმსხვილესი მწარმოებელია და სადაც ყოველწლიურად სხვადასხვა დაავადებების საწინააღმდეგო 1.5 მილიონ დოზა ვაქცინას ქმნიან.
მწარმოებლის მიზანია, რომ სექტემბერ-ოქტომბრისთვის, როცა უკვე COVID-19-ის საწინააღმდეგო ვაქცინის ეფექტურობა ცნობილი იქნება, უკვე არსებობდეს ვაქცინების ის რაოდენობა, რომელიც მსოფლიოში არსებულ მოთხოვნას უპასუხებს.
ინდოეთის სერუმის ინსტიტუტის აღმასრულებელი დირექტორი, ადარ პუნავალა, Times of India-სთან ამბობს, რომ ვერ მოიცდიან. მისი თქმით, ინსტიტუტი თვეში ზემოთ აღნიშნული ვაქცინის 5 მილიონ დოზაზე მეტის წარმოებას გეგმავს, რათა როცა უკვე გაირკვევა, რომ ვაქცინა წარმატებულია, ის საკმარისი რაოდენობის იყოს და მსოფლიოში არსებულ მოთხოვნას უპასუხოს.
"ჩვენ არ ველოდებით ვაქცინის გამოცდის დასრულებას და მის შედეგებს დიდ ბრიტანეთში და არ ვაპირებთ წარმოების მას შემდეგ დაწყებას, რაც ვაქცინის ეფექტურობა გვეცოდინება. ჩვენი მიზანია თვეში 5 მილიონ დოზამდე ვაქცინის დამზადება. ხოლო შემდეგ, როცა უკვე გვეცოდინება, რომ ვაქცინა წარმატებულია, წარმოებას კიდევ უფრო გავზრდით. გვინდა, რომ სექტემბერ-ოქტომბრისთვის 20-დან 40 მილიონამდე დოზა ვაქცინა გვქონდეს მზად“, - ამბობს ინსტიტუტის აღმასრულებელი დირექტორი.
მისივე თქმით, ვაქცინას ხელმისაწვდომი ფასი უნდა ჰქონდეს.
"ვგეგმავთ, რომ ვაქცინას ხელმისაწვდომი ფასი ჰქონდეს. ინდოეთში, დაახლოებით, 13 დოლარი ეღირება“, - ამბობს ის და განმარტავს, რომ ზოგადად, წამლის ფასები სხვადასხვა ქვეყანაში განსხვავებულია და ერთი და იგივე მედიკამენტი შეიძლება სხვაგან უფრო ძვირი ღირდეს" , - აცხადებს ადარ პუნავალა.
