![ასეთი ძვირადღირებული საჩუქარი მიიღო შორენა ბეგაშვილმა ვალენტინობის დღეს](https://itar.ge/stories/creative/HprYO1676376117albom_rooms.jpg)
გორელმა შვილიშვილმა ბებიას სასამართლო დავა მოუგო
- 01/06/21
- 981 ნახვა
-
Facebook-ზე გაზიარება
![სხვა](https://itar.ge/stories/sxvadasxva/Noscq1622577029albom_rooms.jpg)
დღეს, გორის რაიონულ სასამართლოში, ქონებრივი დავა შვილიშვილის სასარგებლოდ გადაწყდა. მოსამართლემ საკუთრების მოწმობა გააუქმა, რომლითაც სახლის მესაკუთრედ ბებიაა დასახელებული.
მოსამართლე ნინო გერგაულის გადაწყვეტილებით, მამისეული სახლი, ბებიის ნაცვლად, შვილიშვილს ეკუთვნის.
22-წლის გოგოს ინტერესებს ადვოკატი ნინო შავშიშვილი იცავს. ადვოკატის თქმით, შვილიშვილმა ჯერ მიწის ნაკვეთი, ახლა უკვე – სახლი დაიბრუნა. საქმე ეხება ერთ-ერთ სოფელში დაწყებულ დავას, რომელიც გოგონას მამის სიკვდილის შემდეგ, დაიწყო.
,,როდესაც ამ გოგოს მამა გარდაიცვალა, სახლი და ქონება მთლიანად ბებიამ დაისაკუთრა. ფაქტობრივად, შვილიშვილი ყოველგვარი ქონების გარეშე დარჩა. ეს გოგო ამჟამად, ცხოვრობს რუსეთში და ამ დრომდე მშობლიურ ქვეყანაში დასარჩენი აღარ ქონდა."" - ამბობს ადვოკატი ნინო შავშიშვილი.
როგორც ადვოკატი აცხადებს, ერთ-ერთი მთავარი არგუმენტი, რითაც შვილიშვილმა ქონება დაიბრუნა, მამისა და ბებიის ცალ-ცალკე ცხოვრების ფაქტი იყო.
წლების წინ, სოფელში, ბებიისა და მისი ვაჟის ოჯახი სხვადასხვა კომლად იყვნენ რეგისტრირებულნი:
,,პირველ რიგში, იმის დამტკიცება მოგვიწია, რომ ბებიისა და ამ გოგოს მამის ოჯახი ცალკე კომლად იყვნენ. მოვიძიეთ შესაბამისი გადაწყვეტილება – გაყრის განაჩენი, რამაც დაადასტურა ორი კომლის არსებობა. პროცესზე დაიკითხა ასევე სოფლის წარმომადგენელი, რომელმაც მეზობლების გამოკითხვის აქტი შეადგინა. ამ აქტში მეზობლები ადასტურებენ, რომ არსებობდა სხვადასხვა კომლი" - განმარტავს ადვოკატი.
ნინო შავშიშვილი მოელის, რომ ბებიის მხარე გადაწყვეტილებას გაასაჩივრებს, თუმცა, მისი აზრით, ეს მხოლოდ დროის გაყვანის მცდელობა იქნება, რადგან გორის მოსამართლის გადაწყვეტილება სამართლიანია და მას გაუქმება არ ემუქრება.